Բրիտանական Treated.com ընկերությունն առողջապահության ոլորտում վերլուծություն է իրականացրել ու կազմել եվրոպական «ամենաառողջ» մայրաքաղաքների վարկանիշային ցուցակը: Այն կազմվել է Numbeo, HPI ThinkTank, World Population Review, World Bank Group և Index Mundi հեղինակավոր աղբյուրներից հավաքված տեղեկատվության հիման վրա:
Վարկանիշային ցուցակը կազմելու գործում հաշվի է առնվել 10 պայման՝ սպորտով զբաղվելու մատչելիությունն ու հասանելիությունը, կյանքի տևողությունը, օդի, ջրի և կյանքի որակը, առողջապահության ծախսերը, մրգերի ու բանջարեղենի գները, ածխաթթու գազի արտանետումները, մարդկանց թիվը, որոնք աշխատանքի են գնում հեծանվով կամ ոտքով, ինչպես նաև կանաչ ծածկույթի որակը:
Եվրոպական 46 մայրաքաղաքների ցուցակում Երևանը զբաղեցրել է 37-րդ տեղը: Մեր հարևան Վրաստանի մայրաքաղաք Թբիլիսին 41-րդն է, Մոսկվան զբաղեցնում է 45-րդ հորիզոնականը: Եվրոպական «ամենաառողջ» մայրաքաղաքների ցուցակում Բաքուն վերջին՝ 46-րդ տեղում է:
Առաջին հինգ պատվավոր հորիզոնականները զբաղեցնում են Կոպենհագենը, Վիեննան, Բեռնը, Հելսինկին ու Բեռլինը:
