Գիրք նվիրելու օրը՝ գրադարաններում և թանգարաններում

Գիրք նվիրելու օրվան ընդառաջ՝ ԿԳՄՍ նախարարության ենթակայության գրադարաններն ու թանգարանները կիրականացնեն թեմատիկ տարաբնույթ միջոցառումներ: Միջոցառումները կանցկացվեն փետրվարի 17-20-ը

Միջոցառումների շրջանակում նախատեսվում են ցուցադրություններ, մանկական ներկայացումներ, թեմատիկ քննարկումներ, կրթական ծրագրեր և հանդիպումներ ոլորտի ներկայացուցիչների հետ:

Փետրվարի 17-ին Խնկո Ապոր անվան ազգային մանկական գրադարանում կմեկնարկի Մանկապատանեկան գրքի երևանյան 19-րդ ցուցահանդես-տոնավաճառը: Ցուցահանդեսը կտևի երեք օր:

Եռօրյա միջոցառումների շրջանակում գրադարանում նախատեսվում է անցկացնել գրքերի ցուցադրություն, շնորհանդեսներ, հանդիպում մանկագիրների և հոգեբանի հետ: Կկազմակերպվեն ինտերակտիվ խաղեր, քուիզներ, վիկտորինաներ, վարպետաց դասեր, գրքերի նկարազարդումներ, թատերական բեմականացումներ, մուլտֆիլմերի դիտումներ ու երաժշտական ունկնդրումներ:

Արդեն երկրորդ անգամ գրադարանի նախաձեռնությամբ կանցկացվի «Քո առաջին գիրքը» ակցիան, որի շրջանակում գրադարանի աշխատակիցները փետրվարի 17-ին ծննդատներից դուրս գրվող նորածիններին և նրանց մայրիկներին գրքեր կնվիրեն:

«Հեքիաթի դեսպան մայրերը» խորագրի ներքո գրադարանի փոքրիկ հյուրերի համար հեքիաթ կընթերցի բլոգեր, երգչուհի Մարիաննա Վարդանյանը: Տոնավաճառի օրերին այցելուները հնարավորություն կունենան նաև համալրել իրենց անձնական գրադարանները հրատարակչություններից ձեռքբերված զեղչված գրքերով:

Տոնավաճառի փակման օրը տեղի կունենա գրադարանի արդեն ավանդական դարձած «Տարվա լավագույն ընթերցող» մրցույթի մրցանակաբաշխությունը: Մրցանականեր կհանձնվեն 2022թ. լավագույն ընթերցողներին:

Միջոցառումների ամբողջական ցանկին ու անցկացման վայրերին կարող եք ծանոթանալ հղումով։