Հայաստանը գրեթե միշտ եղել է որպես հետաքրքիր ու առանձնահատուկ զբոսաշրջային ուղղություն՝ այցելուներին առաջարկելով երկրի հյուրընկալությունը, խորը արմատներ ունեցող պատմությունը, համեղ խոհանոցը, հիասքանչ տեսարաններն ու պատմամշակութային կոթողները, արկածային և գաստրո տուրերը:
Ըստ ՀՀ Զբոսաշրջության կոմիտեի տվյալների 2023 թվականի հուլիսին Հայաստան է այցելել շուրջ 256 հազար զբոսաշրջիկ, ինչը լավագույն վիճակագրական տվյալն է նախորդ տարիների նույն ժամանակահատվածի համեմատ: 2022 թվականի հուլիսին Հայաստան է այցելել շուրջ 189 հազար զբոսաշրջիկ, իսկ 2019 թվականի նույն ժամանակահատվածում՝ 202 հազար:
ՀՀ Զբոսաշրջության կոմիտեի տվյալներով՝ զբոսաշրջային այցելությունների թիվը 2023 թ. հունվարից հուլիս ընկած ժամանակահատվածում կազմել է 1․26 մլն, որը 29%-ով ավելի է 2019թ. նույն ժամանակահատվածի թվերից:
Հայաստան այցելող զբոսաշրջիկների թվերով առաջատար երկրներն են Ռուսաստանը, Վրաստանը և Իրանը:
Կոմիտեն հրավիրում է իրենց երկրներում մեծ լսարան ունեցող բլոգերների, ինֆլյուենսերների, մեդիա ոլորտի ներկայացուցիչների, որոնք լուսաբանում են իրենց այցերը, ինչն իր հերթին նոր զբոսաշրջիկներ է բերում Հայաստան տվյալ երկրներից:
