Շնորհավոր Գիտելիքի և դպրության օր․ Զարթուցիչ

Ծաղիկներ ու փուչիկներ, փայլուն աչքերով դպրոց շտապող առաջին դասարանցիներ և հուզված ծնողներ, իրար կարոտած դասընկերներ, և մեզ գրկաբաց ու ժպիտով դիմավորող ուսուցիչներ։ Ողջո՜ւյն սեպտեմբեր, ողջո՜ւյն աշուն ու նոր ուսումանական տարի։ Շնորհավորում ենք բոլորին և մաղթում խաղաղ ուսումնական տարի։

Իսկ պատրա՞ստ ենք երկար հանգստից ու անհոգ օրերից հետո վերադառնալ դպրոցական առօրյային։ Իսկապես։ Որքան էլ կարոտենք դպրոցը, ուսուցիչներին ու դասընկերներին, միևունույնն է սեպտեմբերի առաջին օրերին դժվար ենք հարմարվում այն մտքի հետ, որ նորից պետք է շուտ արթնանանք և բակում խաղալու փոխարեն տնային աշխատաք կատարենք։ Ծանոթ մտքեր են , չէ՞։ Եթե հաջողվում է հեշտ հաղթահարել այդ փուլը, լավ է, եթե ոչ, օգնության են գալիս հոգեբանները։

Թեմայի շուրջ զրուցել ենք հոգեբան Անի Ապիտոնյանի հետ։ Ի դեպ, տեղյա՞կ եք, որ այս տարվանից Հայաստանի բոլոր դպրոցներում գործելու են հոգեբանական ծառայություններ։ Այդ մասին հայտարարել է Կրթության, գիտության, մշակույթի և սպորտի փոխնախարար Արաքսիա Սվաջյանը ասուլիսի ժամանակ։

«Շատ կարևորում ենք այս ծառայության կայացումը, որովհետև դպրոցն այն միջավայրն է, որը ոչ միայն պետք է գիտելիքներ տա, այլև արժեքային համակարգ պետք է ձևավորի: Դպրոցը պետք է դառնա այն անվտանգ և ապահով միջավայրը, որտեղ երեխան որակյալ և արդյունավետ ուսում ստանալու հնարավորություն կունենա»,-նշել է փոխնախարարը։

Բայց սա այս ուսումնական տարվա միակ նորությունը չէ։ Կրթական տարին կսկսենք այլ փոփոխություններով ևս։ Հաջորդն այն է, որ 2-րդ, 5-րդ և 7-րդ դասարաններում ունենալու ենք նոր դասագրքեր, որոնք ստեղծվել են առարկայական չափորոշիչների պահանջներին համապատասխան: Օրինակ՝ 7-րդ դասարանցիները գրականություն առարկան անցնելու են Արքմենիկ Նիկողոսյանի և Արսեն Վարդանյանի հեղինակած գրքով։ Ու մինչ այն կդրվի յոթերորդցիների սեղանին, հեղինակներից՝ մանկավարժ, կրթության փորձագետ Արսեն Վարդանյանին խնդրել ենք մի փոքր ներկայացնել գրքի բովանդակությունն ու առանձնահատկությունը։