ՀՀ ԿԳՄՍ նախարարության, «Վիշեգրադ» միջազգային հիմնադրամի, Հայաստանում Ֆրանսիայի դեսպանության և Հայաստանի ֆրանսիական ինստիտուտի աջակցությամբ «Ռոլան Բիկով» հիմնադրամը հոկտեմբերի 31-ից նոյեմբերի 4-ը Հայաստանում կանցկացնի «Ռոլան» մանկապատանեկան ֆիլմերի 19-րդ միջազգային փառատոնը:
Այս տարի փառատոնը կանցկացվի Երևանում և ՀՀ 4 մարզում՝ Լոռիում, Շիրակում, Տավուշում և Գեղարքունիքում: Այն նվիրված է Հայ կինոյի 100-ամյակին։
Շուրջ 38 երկրից ստացված 186 ֆիլմերի հայտերից փառատոնի ծրագրում ընդգրկվել է 74 ֆիլմ՝ 28 երկրից:
Փառատոնային օրերի ընթացքում հոկտեմբերի 31-ից նոյեմբերի 4-ը Երևանում՝ «Մոսկվա» կինոթատրոնում, Երևանի մանկապատանեկան ստեղծագործության քաղաքային կենտրոնում, «ԱՅԲ» դպրոցում, «Թումո» ստեղծարար տեխնոլոգիաների կենտրոնում, Նարեկացի արվեստի միությունում և «Երևակ» կրթահամալիրում, ցուցադրվելու են լավագույն փառատոնային անիմացիոն և խաղարկային ֆիլմերը, ինչպես նաև անցկացվելու են ստեղծագործական հանդիպումներ և աշխատարաններ։
ՀՀ մարզերում՝ Գավառի մանկատանը (Գեղարքունիքի մարզ), Տավուշի թեմի առաջնորդարանում (Իջևան, Տավուշի մարզ), Հենրիկ Իգիթյանի անվան գեղագիտության ազգային կենտրոնի Վանաձորի և Գյումրիի մասնաճյուղերում (Լոռու և Շիրակի մարզեր) նույնպես կցուցադրվեն լավագույն փառատոնային անիմացիոն ու խաղարկային ֆիլմեր, կանցկացվեն ցուցահանդես-մրցույթներ։
Փառատոնը կկրի «Դեպի հույս» խորագիրը. միջոցառումներին առավելագույնս կներգրավվեն Հայաստանում բնակություն հաստատած արցախցի երեխաներն ու պատանիները:
«Ռոլան» մանկապատանեկան ֆիլմերի 19-րդ միջազգային փառատոնի ընթացքում բացառիկ իրավունքով կցուցադրվեն բազմաթիվ միջազգային փառատոների մրցանակակիր ֆիլմեր, կիրականացվի «Հայկական ֆիլմերի համայնապատկեր-100» հատուկ ծրագիրը՝ նվիրված Հայ կինոյի 100-ամյակին, որում ներկայացված են 12 հայկական ֆիլմեր: Կանցկացվի «Վիշեգրադ+Հայաստան. միջմշակութային երկխոսության նոր հնարավորություններ» խորագրով հատուկ ծրագիրը։
Փառատոնի բացման արարողությունը տեղի կունենա հոկտեմբերի 31-ին՝ ժամը 19։00-ին, «Մոսկվա» կինոթատրոնում (Կարմիր մեծ դահլիճ):
