Լուրեր

Ամերիկահայ գիտնականները նպատակ ունեն խոշոր ներդրումներ ներգրավել Հայաստանի գիտահետազոտական ոլորտներում

ԱՄՆ այցի շրջանակներում Գլխավոր հանձնակատար Զարեհ Սինանյանը Hero House կենտրոնում հանդիպում է ունեցել Ամերիկայի հայ ճարտարագետների և գիտնականների ընկերակցության անդամների հետ` նախագահ Ռիչարդ Օհանյանի գլխավորությամբ:

Վերջինս շնորհակալություն է հայտնել Զարեհ Սինանյանին այցի համար և նշել, որ ընկերակցությունը պատրաստ է առավելագույնս սերտացնել աշխատանքը հանձնակատարի գրասենյակի հետ: Այնուհետ ներկայացվել են ընկերակցության ծրագրերը, որոնք նպատակ ունեն խոշոր ներդրումներ ներգրավել Հայաստանի գիտահետազոտական ոլորտներում, որի շրջանակներում արդեն իսկ համագործակցում են ՀՀ էկոնոմիկայի և բարձր տեխնոլոգիական արդյունաբերության նախարարությունների հետ:

Ընկերակցությունը ցանկանում է իր մոդելը տարածել նաև Եվրոպայի, Ռուսաստանի և Ավստրալիայի հայ գիտնականների շրջանում` նրանց հավաքելով մեկ հարկի տակ, ինչի իրագործման համար անհրաժեշտ կլինի նաև հանձնակատարի գրասենյակի աջակցությունը : Քննարկվել են նաև սփյուռքահայ մասնագետների համար Հայաստանում կարճաժամկետ կամավորական ծրագրերի մշակմանը, հայաստանյան համալսարանների հետ կապի ստեղծմանը, համահայկական գիտական օլիմպիադաների անցկացմանը, Հայաստանի դպրոցներում հետազոտական հմտությունների ներդրմանն առնչվող հարցեր:

Ցուցադրել ավելի
Back to top button