Լուրեր

Գեղարքունիքի մարզպետը «Մարտական ծառայության» մեդալներ է հանձնել հերոսացած զինծառայողների ծնողներին

Մայիսի 19-ին Գեղարքունիքի մարզպետ Գնել Սանոսյանը «Մարտական ծառայության» մեդալներ է հանձնել 2020 թվականի Արցախյան պատերազմում հայրենիքի համար իրենց կյանքը նվիրաբերած զինծառայողների ծնողներին։

Հայաստանի Հանրապետության նախագահի հրամանագրով` Արցախյան պատերազմի ընթացքում ցուցաբերած խիզախության եւ արիության համար «Մարտական ծառայության» մեդալով են պարգեւատրվել Գավառ քաղաքի բնակիչ Բագրատ Սալամյանը, Ծակքար համայնքի բնակիչ Կոմիտաս Ղուկասյանը, Լիճք համայնքի բնակիչ Արտյոմ Ավետիսյանը, Ծովինար համայնքի բնակիչ Հովհաննես Ենգոյանը, Վաղաշեն համայնքի բնակիչներ Արտյոմ Խաչատրյանը, Նվեր Բադոյանը, Զոհրաբ Արշակյանը, Նորայր Հայրապետյանը, Խաժակ Գրիգորյանը, Սամվել Գասպարյանը եւ Արտյոմ Պետրոսյանը։

«Պետական բարձր պարգեւն իսկ հուշում ու փաստում է, թե ինչ սխրանքներ են գործել մեր հերոս տղաները, արիության ինչ դասեր են տվել։Նրանք այն խիզախ ու նվիրյալ զինվորներն էին, որ թշնամու դեմ կռիվ տվեցին մինչեւ վերջին շունչը: Հանուն նրանց անունների հարատեւության ու անավարտ նպատակների, հանուն մեր հայրենիքի հավերժության մենք պետք է հզորանանք ու միավորվենք, արարենք ու շենացնենք մեր երկիրը։ Հավերժ փառք ու պատիվ մեր հերոսներին»,-պարգեւատրված զինծառայողների ծնողներին եւ հարազատներին ուղղած սփոփանքի խոսքում նշել է մարզպետ Գնել Սանոսյանը։

Ցուցադրել ավելի
Back to top button