Ռոմանոս Մելիքյանի անվան պետական երաժշտական քոլեջն իրականացնում է «Ռոմանոս Մելիքյանը և ռոմանսի ճանապարհը» մարզային ծրագիրը։ Այն մայիսի 2-ին մեկնարկում է Տավուշի մարզում՝ Բերդի երաժշտական և արվեստի դպրոցի համերգային դահլիճում։ Մյուս երկու համերգները տեղի կունենան Ջերմուկում և Գյումրիում։
Մարզային այս ծրագիրը բաղկացած է երեք համերգներից, որոնց ընթացքում կկատարվեն Ռ․ Մելիքյանի ռոմանսները, ինչպես նաև կներկայացվի ռոմանսի ժանրը՝ ստեղծման շրջանից մինչև մեր օրեր։
Ծրագիրն իրականացվում է ՀՀ ԿԳՄՍ նախարարության աջակցությամբ, նպատակն է ներկայացնել Ռոմանոս Մելիքյանին, նրա հեղինակած ռոմանսները և ռոմանսի ժանրը։ Կարևոր նպատակներից է նաև միջոցառումների միջոցով նպաստել երեխաների գեղագիտական դաստիարակությանը, ծանոթացնել հայ և համաշխարհային երաժշտության, մասնավորապես՝ ռոմանսների ստեղծման պատմությանը:
