Խնկո Ապոր անվան ազգային մանկական գրադարանում փետրվարի 19-ից 21-ը տեղի կունենա «Մանկապատանեկան գրքի երևանյան» 20-րդ ցուցահանդես-տոնավաճառը։ Բացման հանդիսավոր արարողությունը տեղի կունենա փետրվարի 19-ին՝ Հայոց բանաստեղծ Հովհաննես Թումանյանի ծննդյան օրը, որն ինչպես գիտեք, Հայաստանում նշվում է նաև որպես «Գիրք նվիրելու օր»։ Բացման օրը կկայանա «Տարվա լավագույն ընթերցող» մրցույթի մրցանակաբաշխության և պարգևատրման արարողությունը, կանցկացվեն նաև բազմաբնույթ միջոցառումներ՝ տարբեր հետաքրքրությունների և տարիքային խմբերի երեխաների համար։
Ցուցահանդեսի երեք օրերի ընթացքում նախատեսվում են գրքերի շնորհանդեսներ, հանդիպումներ մանկագիրների և նկարազարդողների հետ։ Կկազմակերպվեն նաև ինտերակտիվ խաղեր, վիկտորինաներ, հեքիաթապատումներ, վարպետության դասեր, գրքերի նկարազարդումներ, թատերական ու տիկնիկային ներկայացումներ, մուլտֆիլմերի դիտումներ և երաժշտական ունկնդրումներ: Այցելուները հնարավորություն կունենան նաև հրատարակչություններից ձեռք բերել մանկապատանեկան գրքեր՝ հատուկ զեղչերով:
Այնպես որ, սիրելի ընկերներ փետրվարի 19-ից 21-ը Խնկո Ապոր անվան ազգային մանկական գրադարանում գրքի տոն է լինելու, որին խորհուրդ ենք տալիս անպայման մասնակցել։
Իսկ մինչ այդ առաջարկում ենք ծանոթանալ Զարթուցիչի թղթակիցներ Նելիի և Սոնայի պատրաստած ‹‹Գրքերը մեր կյանքում›› էջին և նոր գիրք կարդացած ներկայանալ միջոցառամանը, կամ էլ կողմնորոշվել, թե ինչ գիրք եք ցանկանում նվիրել ձեր ընկերներին Գիրք նվիրելու օրվա առթիվ։
Սոնա — Եթե ավարտել եք նախորդ գիրքն ու չեք կողմնորոշվում ինչ կարդալ հիմա, մենք ձեզ կօգնենք։ Այս անգամ մեր ուշադրությունը գրավել է մի գիրք, որը կարդալուց հետո հետաքրքիր փոփոխություններ կնկատեք ձեր կյանքում։ Օրինակ՝ կսովորեք կառավարել միտքը, ավելի հեշտությամբ հասնել նպատակներին, ինչպես նաև տիրապետել ինքնավերահսկողության արվեստին:
Նելլի — Խոսքը Ռոբին Շարմայի ‹‹Վանականը, որը վաճառեց իր ‹‹ֆերարին›› գրքի մասին է, որը համարվում է բեսթելլեր համաշխարհային գրականության մեջ։ Այն պատմում է երբեմնի աշխարհահռչակ իրավաբան Ջուլիան Մենթլի և ոչ պակաս լավ իրավաբան Ջոնի մասին։
Սոնա — Տարիներ շարունակ՝ նվիրվելով իրավաբանությանը Ջուլիան Մենթլը հանկարծ հասկանում է, որ այլևս հաճույք չի ստանում իր աշխատանքից և որոշում է արմատապես փոխել իր կյանքը։ Նա հրաժարվում է իր կարիերայից, ընտանիքից, անգամ սիրելի ֆերարիից և ուղևորվում է հեռավոր Հնդկաստան՝ բացահայտելու Սիվանայի իմաստունների հաջողության գաղտնիքը։
Նելլի — Եվ մի երեկո ամբողջովին փոխված և անճանաչելի դարձած Ջուլիանը վերադառնում է իր հին բնակավայր և որոշում այցելել իր գործընկերոջը` Ջոնին։ Ամբողջ գիշեր նրանք միասին են անցկացնում և Ջուլիանը Ջոնին պատմում է բոլոր այն հմտությունների մասին, որոնք նա սովորել է Սիվանայի իմաստուններից։ Ջոնը համբերատար ու հիացած լսում է իր հին ընկերոջ պատմությունները, ընդունում է խորհուրդները և խոստանում այլևս չկրկնել նախորդ սխալները։
Սոնա — ‹‹Վանականը, որը վաճառեց իր ‹‹ֆերարին›› վեպն իսկապես լի է ոգեշնչող խոսքերով և մենք առանձնացրել ենք դրանցից մի քանիսը։
‹‹Երբ համարձակվում ես դուրս գալ սեփական հարմարավետության գոտուց և ուսումնասիրել անհայտը, դու բացահայտում ես քո իրական հնարավորությունները։ Սա ինքնակատարելագործման առաջին քայլն է։››
‹‹Կյանքում սխալներ չկան, կան միայն դասեր։ Չկա բացասական փորձ ասվածը, կան միայն աճելու, սովորելու և առաջ գնալու հնարավորություններ ինքնակատարելագործման ճանապարհին։››
‹‹Տիեզերքը պարգևատրում է համարձակներին։ Երբ դու մեկընդմիշտ որոշել ես փոխել կյանքդ, քո հոգու ուժը կառաջնորդի քեզ դեպի հրաշքներով լի մի կախարդական աշխարհ››:
Եվ վերջում 5 պատճառ, թե ինչու կարդալ հենց այս գիրքը։
1) Գիրքը սովորեցնում է գնահատել ժամանակը։
2) Չզղջալ անցյալի համար ու շարժվել առաջ։
3) Միանգամից չձգտել արդյունքի, այլ հաճույք ստանալ ընթացքից։
4) Փորձել գերազանցել սեփական «ես»-ը, այլ ոչ ուրիշներին։
5) Չմտածել անցյալի և ապագայի մասին, այլ ապրել ներկայով։
Եվ միշտ հիշեք. ‹‹Իմաստունները գիտեն, որ անցյալը ջուր է, որը հոսում է կամրջի տակով, իսկ ապագան հեռվում` հորիզոնի վրա բացվող արեգակ է։ Մարդու համար ամենակարևորը ներկան է, սովորիր ապրել ներկայով և վայելիր այն ամբողջ սրտով։››
Այսքանը Ռոբին Շարմայի ‹‹Վանականը, որը վաճառեց իր ‹‹ֆերարին›› գրքի մասին։ Հուսով ենք կկարդաք և կհավանեք այն։
