Նատալի Բալոյանը սովորում է Երևանի Խ․ Աբովյանի անվան դպրոցում, երկրորդ դասարանում։
Երկու ամենասիրելի առարկաները մաթեմատիկան և ֆիզկուլտուրան են, իսկ, օրինակ, տեխնոլոգիան, չէ՛, սիրելիների շարքում չէ։
-Դե՛, այնտեղ մի քանի բաներ ինձ համար դժվար են լինում, և․․․Ես չեմ սիրում, որ այդպես է,-ազնվորեն ասում է Նատալին։
Դասղեկի ժամն էլ է սիրում, որովհետև հետաքրքիր են անցնում այդ ժամերը․ երգում են, կենդանիների մասին հետաքրքիր պատմություններ լսում,պարզապես զրուցում իրար հետ։
Նատալին Մատենադարանի «Փոքրիկ Ծաղկողներ» ստուդիայի սան է և մանրանկարչություն է սովորում այստեղ։
Պարել շատ է սիրում և ուզում է պարի հաճախել, բայց․․․Այստեղ փոքրիկ մի բայց կա, ավելի ճիշտ՝ պայման, որը մայրիկն է առաջադրել, Նատալին էլ համաձայնել է։ Պետք է, որ նա սկսի մի քիչ ավելի արագ սովորել դասերը։ Նատալին ընդունել է պայմանը և հիմա փորձում է ավելի արագ սովորել։ Դե, պայմանը պայման է․․․
Նատալին ընկերասեր աղջիկ է, ընկերներ շատ ունի․ Նիկայի հետ սիրում է բառախաղ խաղալ, Սոսեի հետ՝ վազվզել, Արևիկի հետ՝ նկարել, ապլիկացիաներ անել։
Ի դեպ, այս հանդիպման վերջում Նատալին ու ես բառախաղ ենք խաղալու, կարող եք միանալ մեզ․․․
էլ ի՞նչ պատմեմ մեր նոր ընկերոջ մասին։ Ավելի լավ չի՞ լինի՝ միանաք մեր զրույցին․․․