Օրացույցը հիշեցնում է, որ այսօր հեռախոսի ծննդյան օրն է։
Չնայած հեռավորության վրա ձայնային հաղորդակցության գաղափարը մշակվել էր տասնիններորդ դարի կեսին ֆրանսիացի ինժեներ մեխանիկ Շարլ Բուրսելի կողմից և հենց նա է առաջին անգամ օգտագործել «տելե–ֆոն»՝ «հեռախոս» բառը, բայց սարքի ստեղծողն է համարվում ամերիկացի գիտնական Ալեքսանդր Բելլը։
1876 թվականի մարտի յոթին ԱՄՆ-ում Բելլն ստացավ իր ստեղծած սարքի արտոնագիրը, որն էլ հաստատեց նրա՝ գյուտի հեղինակի իրավունքը։
Ծննդյան օրից մինչև այսօր «հեռախոս» սարքը շատ կերպարանափոխությունների է ենթարկվել, որից սակայն չի փոխվել դրա շատ կարևոր դերը՝ հեռվից հեռու միմյանց հետ խոսելու հնարավորություն ստեղծելը։
Մարտի 7-ը նաև Հարավային բևեռի հայտնագործության օրն է համարվում։ 1912 թվականի մարտի յոթին Թասմանիա կղզու Հոբարթ քաղաքից նորվեգացի բևեռախույզ Ռուալ Ամունդսենը տեղեկացրեց աշխարհին, որ հայտնաբերել է Հարավային բևեռը։
Եթե սիրում եք աշխարհագրական բացահայտումների մասին պատմությունները, որոնք նախևառաջ խիզախ մարդկանց պատմություններ են, այսօր աշխարհագրության դասին կարող եք հենց ա՛յս պատմությանը ծանոթանալ ձեր ուսուցիչների օգնությամբ։