Պարը բարելավում է հիշողությունը՝ գիտեի՞ք այդ մասին։ Երբ մենք պարելիս փորձում ենք անգիր հիշել վարժությունների ու բարդ քայլերի հաջորդականությունը, մեր ուղեղը ձանձրանալու ժամանակ չի ունենում։ Սա էլ թույլ է տալիս պահպանել մարմնի արագ արձագանքը և օգնում է ուղեղին երիտասարդ ու ճկուն մնալ։
Այո, հետազոտությունները ցույց են տվել, որ պարը բարելավում է մեր ռեֆլեքսներն ու կոորդինացիան, ինչն էլ իր հերթին օգնում է ամրապնդել նյարդային համակարգը։
Իսկ դուք սիրո՞ւմ եք պարել։
Պարի միջազգային օրը նշվում է ՅՈՒՆԵՍԿՕ-ի Պարի միջազգային խորհրդի նախաձեռնությամբ՝ սկսած 1982 թվականից։
Հարց է առաջանում, իսկ ինչո՞ւ է նշվում հենց ապրիլի 29-ին․․․որովհետև այս օրն է ծնվել ֆրանսիացի պարուսույց Ժան-Ժորժ Նովերը, որը պարի տեսաբան էր և պատմության մեջ հիշվում է, որպես «ժամանակակից բալետի հայր»։
Նախաձեռնողների և հիմնադիրների կարծիքով՝ այս տոնի հիմնական գաղափարը բոլոր պարային ոճերը միավորելն է՝ որպես մեկ արվեստի ձև։ Պարը նպաստում է քաղաքական, մշակութային և էթնիկ սահմաններն ամրապնդելուն, ինչպես նաև՝ մարդկանց միջև բարեկամություն և խաղաղություն ապահովելուն։
Պարը թույլ է տալիս խոսել մեկ լեզվով, և դա պարի լեզուն է։ Հին ժամանակներում պարը եղել է հեթանոսական, կրոնական ծեսերի, ինչպես նաև՝ մարտերի, աշխատանքի և այլ տոների շատ կարևոր արարողակարգ։ Այսօր այն համարվում է սպորտ, արվեստ, մասնագիտություն և հանգստի միջոց ու սիրված է շատերի կողմից։
Ամեն տարի՝ ապրիլյան այս օրը, օպերայի և բալետի թատերախմբերը, ժամանակակից պարային խմբերն ու ստուդիաները, պարահանդեսային և ժողովրդական պարերի անսամբլները․․․ թե՛ պրոֆեսիոնալ ու թե՛ սիրողական արտիստները նշում են իրենց մասնագիտական տոնը։ Եվ իհարկե, տոնին են միանում բոլոր նրանք, ովքեր պարզապես սիրում են պարել։
Օրը տոնում են տարբեր կերպ՝ ավանդական համերգներ, ներկայացումներ, պարային ֆլեշմոբեր և վարպետության դասեր։ Ի դեպ, հիշեցնենք, որ Ազգային երգ ու պարի ակադեմիան, «Կարին» ավանդական երգ ու պարի խմբի գլխավորությամբ, այսօր նշելու է Պարի միջազգային օրը: Միջոցառումը տեղի է ունենալու երեկոյան՝ ժամը 19։00-ին, Երևանի Ազատության հրապարակում:
Մենք շնորհավորում են պարարվեստի բոլոր նվիրյալներին ու նաև նրանց, ովքեր առանց պարի չեն պատկերացնում իրենց կյանքը։
