Վերջին ամիսների ընթացքում մայրաքաղաքի երթևեկության մեջ մի շարք փոփոխություններ են կատարվել։ Փոփոխությունները հիմնականում կատարվում են, ելնելով մեքենաների հոսքի քանակից, մոտակայքում նոր շինություններ հայտնվելու դեպքում՝ երթևեկությունը կարգավորելու և ավելի հարմարավետ դարձնելու համար։
Յուրաքանչյուր փոփոխությունից առաջ անցկացվում է փորձնական փուլ, երբ մի քանի օր, շաբաթ փողոցի այս կամ այն հատվածում դիտարկումներ են իրականացվում փոփոխությունների դրական և բացասական կողմերի վերաբերյալ։
Երբեմն փոփոխություններն ավելի շատ բացասական արդյունք են տալիս և, բնականաբար, փորձնական փուլից հետո դրանք չեն ներդրվում։ Օրինակ՝ ինչպես Արշակունյաց պողոտայի և Գարեգին Նժդեհ փողոցի հատման կետում կազմակերպված շրջանաձև երթևեկությունը։ Ինչո՞ւ չարդարացվեց նման փոփոխությունը։ «Ճանապարհային երթևեկության անվտանգություն և վերահսկողություն» հ/կ-ի հիմնադիր Սերգեյ Ղահրամանյանն ունի մի քանի բացատրություն։ Ըստ նրա, նախ՝ տվյալ տարածքում մեքենաները խաչմերուկին մոտենում են տարբեր արագություններով, ցավոք, հայ վարորդները զիջել այդքան էլ չեն սիրում և վերջինը՝ մի խաչմերուկից կուտակումները տեղափոխվում էին մեկ այլ՝ չափերով ավելի փոքր ու ևս ծանրաբեռնված խաչմերուկներ։
