Ռադիոարվեստանոցում այսօր զրուցում ենք նկարիչ Տիգրան Մատուլյանի հետ: Նրա արվեստանոցը գտնվում է շենքի տանիքում, որտեղից շատ պարզ երևում է Արարատը:
Մի անգամ, մի մեծահարուստ մարդ էր եկել ինձ հյուր: Ասացի՝ «Գիտե՞ս, ես էլ եմ շատ հարուստ», ասաց՝ «Ինչպե՞ս հասկնանք», պատասխանեցի՝ «Արի պատշգամբ կտեսնես»: Եկավ Մասիսը տեսավ, ասաց՝ «Դու ինձմէ հարուստ ես…»
Էս սարին պետք է հանգիստ թողնենք. չի կարելի իրեն էդքան տանջել: Սարյանը նկարել է՝ հերիք է, էնքան սիրուն է նկարել, որ էլ ի՞նչ պետք է անես, որ դրանից լավ ստացվի:
Իմ սիրելի նկարիչները միշտ փոխվում են: Վերմեր եմ շատ սիրում: Արշիլ Գորկի եմ սիրում: Ես նաև էթնիկ մշակույթի սիրահար եմ:Ամեն ինչ նայում եմ, ամեն ինչ ուսումնասիրում:
Իսկական նկարիչ դառնալու համար մարդը պետք է կրթվի, պետք է սովորի նկարել, նկարչությունն ունի սովորելու բաժին, եթե դա չսովորես, մասնագետ չես դառնա:
Նկար սկսելուց առաջ ես երկա՜ր նայում եմ կտավի վրա…Այդ պահին ես պսպղուն կետիկներ եմ նկատում ու անցնում եմ գործի… Թեմաներ շատ ունեմ: