Expper Technologies ընկերությունը Robin ռոբոտի թեստավորումը՝ առողջապահության ոլորտում, սկսեց դեռ ամիսներ առաջ: Robin-ը՝ որպես արհեստական բանականության տեխնոլոգիայով աշխատող ռոբոտ, կարողանում է զգացմունքներ առաջացնել և հույզեր փոխանցել՝ մարդկանց հետ հաղորդակցվելու ընթացքում:
Պիլոտային ծրագրի շրջանակում Wigmore կլինիկայում ներկայացվող Robin-ի հետ մինչ օրս բուժում անցնող ավելի քան 85 երեխա հաղորդակցվելու հնարավորություն է ստացել:
Expper Technologies ընկերությունում նշում են, որ հիվանդանոցային միջավայրը, որը երեխաների համար անհյուրընկալ, ցավերի եւ տհաճ դեղերի հետ ասոցացվող մռայլ աշխարհ է, կարծես գունավորվել է Robin-ի հայտնվելուց հետո:
Սովորաբար, իրենց առօրյա միջավայրից կտրված, եւ, օրեր շարունակ, հիվանդասենյակում բուժվող երեխաներն իրենց ճնշված են զգում, միայնակ եւ անտրամադիր, ինչը բացասաբար է անդրադառնում ապաքինման եւ բուժման ընթացքի վրա: Robin-ը, իր յուրահատուկ մոտեցմամբ, կարողանում երեխաներին դուրս բերել դեպերեսիվ վիճակից։ Նրանք սկսում են ավելի հաճախ շփվել, ինչի արդյունքում հեշտանում է բժշկական անձնակազմի հետագա աշխատանքը:
Բացի այդ, ցավոտ միջամտությունների ժամանակ Robin-ին հաջողվում է շեղել երեխաների ուշադրությունը եւ նվազեցնել ցավի ընկալումը»,- ընդգծում է Expper Technologies-ի հիմնադիրը եւ հավելում, որ Robin-ի հետ շփումից հետո որոշ երեխաների մոտ, նույնիսկ, ախորժակն է լավանում:
Ռոբինը երեխայի հետ անմիջական զրույցի կարողություն ունի։
Ռոբոտի առանձնահատկություններից մեկը՝ երեխաների հետ անմիջական զրույց սկսելու կարողությունն է: Նրան հաջողվում է հուզական կապ ստեղծել իր եւ պացիենտի միջեւ: Robin-ը շատ պրպտող է, իսկ հարցերի շրջանակը՝ բավականին լայն. օրինակ՝ հետաքրքրվում է հիվանդ երեխայի տրամադրությամբ, հարցեր տալիս խաղալիքների, նախասիրությունների, ընկերների կամ ընտանիքի մասին, ի հայտ է բերում երեխայի անհանգստություններն ու փորձում պատասխանել նրան հուզող հարցերին:
Robin-ին հաջողվում է մեղմացնել ցավի ընկալումը: Բուժվող երեխաները Robin-ին ընկալում են որպես հասակակցի,որպես ընկերոջ,և, ինչպես Կարենն է նշում, անպայման ուզում են ծանոթացնել իրենց ընտանիքի մյուս անդամների հետ:
Բժշկական անձնակազմի համար եւս ռոբոտի հետ շփումը նոր փորձ է, բայց թե՛ բժիշկները, թե՛ բուժքույրերը սիրով են արձագանքում Robin-ի ներկայությանը կլինիկայի տարածքում: Robin-ին հաջողվում է մեղմացնել երեխաների ցավի ընկալումը, երբ նրանցից արյուն են վերցնում կամ կաթետեր տեղադրում: Արդյունքում, անձնակազմը խնայում է սեփական ժամանակն ու նյարդերը: Բարդ դեպքերի ժամանակ բուժքույրերն իրենք են կանչում Robin-ին եւ դիմում նրա օգնությանը: Կարծում եմ, սա Robin-ի արդյունավետությունը հաստատող ամենահստակ ցուցանիշն է։
